Luke 23

Iesu Ga Ru At Lavapaase Ro Melamgo At Ne Paelat

(Mt 27:1-2, 11-14; Mk 15:1-5; Jo 18:28-38)

1Luvuttadi amgomgo axap diga xatu kaxat la diga lam kaka ne Iesu uto melamgo at ne Paelat. 2La diga bala raba i, diga lok, “Ma ranga alis na laradi, neni i sasar asoogong amisik limixin atnama. I tong i ridi do, nemen dita kepe pilas ti ne Kaisar, la ik lok bok do neni mo ne Karisito, loorong silok.”

3La ne Paelat ga sue i, “Kereva, nenu loorong silok at limixin me Judaia?”

La ne Iesu ga lok, “I ruturun. Nenu xa u tong i.”

4Melemu ne Paelat ga lok ti lavamaasa silok la limixin keretna, “Axo vuse ka tavasuun kusu ri sev amet na laradi.”

5Ketla digap kup aleng keretna, “Neni ik paxaru kaxat levenesep kantubu at limixin at lengkot axap Judaia mi leveloklox ase ren. Neni ga ru ka i ro Galili la monga neni garat pas ude.”

Iesu Ga Ru At Lavapaase Ro Melamgo At Ne Erodes

6Se ne Paelat ga ronga i na, neni ga sue, “Kereva na laradi, neni boro Galili?” 7Se ne Paelat gaklen ba i do ne Iesu boro Galili, mo lenep ne Erodes gak lok tatao i, neni ga riki ne Iesu uto at ne Erodes, mo ga nemen go Jerusalem ap mo levenaleng.

8Se ne Erodes ga ven ne Iesu, neni ga lok momo aleng; neni gang tonga mene levelinga mumu i, la buaang levenaleng neni ga vara i xusu na ven be ne Iesu. Ni ga vara aleng i xusu naba ven ne Iesu na lok tempanga sangsangu. 9Kuren la ne Erodes ga sue ne Iesu mi laxasusue solo, ketla ne Iesu goxo vorang i mi tekolinga. 10Lavamaasa silok mi luvuttadi loklox ase at Lenavolo digak lok bok go, la diga vaase babala raba aleng ne Iesu. 11La ne Erodes eburu mi limixin esep teren diga saba xangka rino ne Iesu la diga vaxasiga i mi lavanga singsigaara at loorong silok kusu dina lok kalise i, la diga riki amlong i uto at ne Paelat. 12Ap mo mun laaleng Erodes mi ne Paelat duga etangas; duga munepen avot mun be at nai.

Luvuttadi Amgomgo Diga Sue Ne Paelat Do Ne Iesu Na Met

(Mt 27:15-26; Mk 15:6-15; Jo 18:39-19:16)

13Paelat ga xup bubua ka lavamaasa silok la luvuttadi amgomgo at limixin. 14La ni ga lok tidi, “Mi raba ia mi na laradi la mi lok do neni i sasar asoogong limixin. Monga nia a ven axasep teren de melamgo atnimi axap, la axo long lenget tavanga do neni ga bixurun at tavanga xapmek mi vaase mumu i min. 15Kopla ne Erodes gita long lenger i ga bixurun, mila neni i riki amlong i ude saparap dik. La kopmen tempanga na laradi ga lox i xusu neni na met teren. 16Ketla anak pixis mun i, la ana soxomus asu manga i.” 17[Amisik at leluxa at Lovovolo Pe, laradi gomgo gak soxomus asu raba limixin mi taradi xokoxo.]

18Ketla limixin axap diga xup lolos ngan legesara la diga lok, “Sev amer i! La una soxomus asu raba nama mi ne Barabas!” 19Diga lok li ne Barabas at loxokoxo mila leesep ga ru kaxat go at lemenemen silok, la ni ga sev amet lara laradi.

20Paelat ga vara i xusu na soxomus asu ne Iesu uto, kuren la ni ga xup manga ti limixin. 21Ketla diga vaase amlong tin, la diga lok, “Paxarem i. Paxarem i at laxaba!”

22Paelat ga vaase manga ridi ga sev avantun, “Ketla laxapmek salai neni ga lox i? Axo vuse ka tevelinga xusu neni naba met teren! Anak pixis mene i la ana soxomus asu manga i.”

23Ketla digap kup lolos amisik do ne Paelat na vaxarem ne Iesu at laxaba; la ne Paelat goxo epovo na ba gili levendoxoma atdi. 24Kuren la ne Paelat ga mu asu lavavara at limixin mumu ne Iesu. 25Neni ga soxomus asu mo laradi diga lok li i ro at loxokoxo mumu leesep la lesepsev amet tadi, la ni ga raba nedi mi ne Iesu xusu dina lok lavanga salai nedi diga vara i min.

Diga Vaxarem Ne Iesu At Laxaba

(Mt 27:32-44; Mk 15:21-32; Jo 19:17-27)

26Diga lam kaka ne Iesu boro at loogu at ne Paelat la diga vas kaxat min uto at loxot diba sev amer i ren. At lavatpas atdi diga ekip tangarang mi lara laradi laasen teren ne Simon, boro Sairini, mo gat pas uto xeneng at lemenemen silok; ga laa boro at loxot petpes. Diga ranga alis i, la diga sox aruru parang i xusu nap kip mu asu ne Iesu mi laxaba.

27Buaang nedi limixin diga mumu asu ne Iesu; kantubu atdi lentaba lavakin digang teng la diga duudu mumu ne Iesu. 28Iesu ga milik amlong tidi la ga lok, “Nemi lavakin boro Jerusalem! Nemen mitang tingis ia, ketla minang tingis laxamdak mi laxaalik kakalik atnimi, 29mila levenaleng songsongot naba vot la limixin diba lok, ‘Naba lox avukat ti lavakin kopmen dixo ruuna laxamdak mi laxaalik kakalik, la kopmen dina visik tengkadede.’ 30Ap mo levenaleng limixin diba lok ti lempattavut keretna,

‘Mina subu pavaa nama!’ la ri lempatkaana, ‘Mina sak pavaa nama!’ ^a

31Do nedi di lok na lempanga xapmek tia, laradi avukat, Moroa naba vorang i ridi mi langsangan lumumuat silok.”

32Limixin esep diga lok kaka bok legepu radi, nedu buru luradi xapmek, kusu diba sev amet du eburu mi ne Iesu. 33Diga rupot to at loxot laasen teren, “Lavatlak Tongan,” la diga lok li ne Iesu ro at laxaba, la luradi xapmek bok, lara ga merem saparap lekngen tino at ne Iesu la lara ro saparap lekngen kia. 34La ne Iesu ga lok, “Tamak, una doxoma xepe na laxakapmek atdi. Dixoklen lavanga salai mo di lox i.” La diga epes levempanga singsiga ren kantubu atdi, diga lu buru mi lengkonuat, kusu ri lok kisip ka nege ba lok kaka i.

35Limixin diga tu go diga reven lempanga diga lox i ri ne Iesu. La luvuttadi amgomgo at leme Judaia diga lok kalise i, diga lok keretna, “Neni gak lox arooro lentaba vetpes; mo do neni Lanarong at ne Moroa ga soxolik ka i, neni ba lox arooro xa i.”

36Luvuttadi esep bok diga lok kalise i, diga ru auret ne Iesu la diga raba i mi laxadan vaen. 37La diga lok, “Una lox arooro xa u, mo do nenu loorong silok at limixin me Judaia!”

38La na levelinga diga malagan i ro mavana ren keretna, “Na laradi neni Loorong Silok at limixin me Judaia.”

39La lara laradi xapmek ga merem go, ga vaase aksaksa rin, la ga lok, “Kereva kopmen nenu Lanarong? Una lox arooro u eburu minama’.”

40La mo lara ga vaase sox i, la ga lok, “Kereva, uxo marat at ne Moroa? Neda na ta lok ka loklox aleeng mumu laxakapmek atda. 41La lumumuat tida ik mokso mila taga lok laxakapmek, i epovo ri na lumumuat; ketla neni laradi goxo lok taxakapmek.”

42La ni ga lok ti ne Iesu xeretna, “Iesu, una doxoma ia, do unamlong ngan loorong silok!”

43La ne Iesu ga lok tin, “A tong i na ru, lingina unaba nemen eburu minia ro at lemenemen at ne Moroa.”

Lanmet At Ne Iesu

(Mt 27:45-56; Mk 15:33-41; Jo 19:28-30)

44Ga auret ti lasangaun legepu xonaleng, lamain ga lok pe laxangking la ga vung pe mo lenep silok axap se at lavantun konaleng. 45La lavattamon ga merem to xeneng at loogu laplavang ga rem lais ti legepu xot. 46La ne Iesu ga xup lolos, ni ga lok, “Tamak, a lok li loroonan tarak at lukngam!” Ni ga tong i na la ga met ta.

47La laasesep ga ven i na la ni ga emi asu mi ne Moroa la ga lok, “I ruturun tinotno, neni laradi mokmokso.” 48La limixin mo diga tu go xusu dina ven i na, diga vas kaxat uto xolonu, diga posope lenbongobong atnedi mi lainbulu. 49Mo limixin digakleklen ne Iesu, eburu mi lavakin no diga mumu ne Iesu boro Galili, diga ru paxalom lixilik kusu dina ven na lempanga.

Digak Mit Ne Iesu

(Mt 27:57-61; Mk 15:42-47; Jo 19:38-42)

50Lara laradi laasen teren ne Josep boro at lara lemenemen at leme Judaia laasen teren Arimatia. Ga neni lagale laradi, la limixin diga lok ngangao aleng teren, la ni ga ngangais Linintoo at ne Moroa. 51Neni lara atnedi at lixitkis buru diga bala raba ne Iesu, ketla neni goxo siam mu levendoxoma la loklok diga lox i. 52Neni ga vot pasa ne Paelat la ga sing kaka labantuxu at ne Iesu. 53Melemu neni ga lox asi labantuxu at ne Iesu ukopok, la ga bom i mi labantamon nunuan, la ga lok li i ro at lamaaut, diga xe i ro at lavaruat silok; limixin di goxovisi li rongan go. 54Mo laaleng ni laaleng gagas la laaleng kaala mo ga auret.

55Lavakin no diga mumu ne Iesu boro Galili diga emu mi ne Josep la diga ven lamaaut la labantuxu at ne Iesu ne Josep ga li i. 56Melemu digamlong ukolonu la diga lox agagas li levendan mavak mi levendan momonok ti soli i at labantuxu at ne Iesu. At laaleng kaala diga lox amas, kerekngan Lenavolo ga tong i.